الحياة بقت كلها تراب فى تراب تنزل من بيتك تلاقى مدام فظيعة بترزع سجادتها علقة تخلف وراها شبورة تراب و فى الدور الارضى الست رزقة بتهيل التراب على دماغها لان بعلها عم دقدق البواب مات و الكناسين بينقلوا التراب من رصيف لرصيف و تراب مداخن الاسمنت بتلعلع فى السما و رياح الخماسين تنقلنا تراب الصحرا الغربية و العمارات و التماثيل و اتوبيسات النقل العام عليها شبرين تراب و عمنا عبد الوهاب بيغنى ايها الراقدون تحت التراب و اسكندرية ماريا و ترابها زعفران ازاى يعنى التراب يبقى زعفران هذه الحالة الترابية الفنا عليها امثال ان فاتك الميرى اتمرمغ فى ترابه و اللى راجع من بره بعد سنين غربة عشان تراب مصر و الزعما تصرخ يجب ان ندافع عن تراب مصر و الخائن اللى ما يستحقش يعيش فوق تراب مصر و القلة المندسة اللى خسارة فيها التراب اللى بتمشى عليه لانهم خونة و خانوا تراب هذا الوطن و احنا من تراب و راجعين اليه و انفردنا بلون جديد اسمه اللون الترابى و فى النهاية هايدفنا فى التراب واحد تربى
عشان كده تعالوا كلنا نغنى
احلف بسماها و بترابها
و الترابو عليكم و رحمة الله و بركاته