المربوط فى ظل سونيا

تبدأ المشكلة عندما تقدس من تحب وهى تطبيق لأنت بابا و انت ماما و انت انور وجدى و عماد حمدى كمان ليه لأنك اتربيت غلط و ارتبطت بشدة بالسيد بابا و الست ماما فأنت مفتون بالشخص الذى تحبه فاءذا اكلت سونيا كرنب تأكله انت رغم كرهك له و من جهلها تقنعك ان حسين فهمى كان احسن هداف فى نادى طنطا و انت عارف ان حسين عمره ما لعب حتى بلى و من فرط التصاقك بها فاءن كان اسمك بعرور سينسى الناس اسمك و شخصيتك ان وجدت و سيقولون مش ده اللى تبع سونيا ؟ يكون فى علمك لن يتحمل من تحب ان يظل طول حياته يعيش مع نسخة مشوهة منه . عيب عليك يا بعرور ارجع لعقلك لأن مفيش حد بيكرهك فى الدنيا قد سونيا

الحب وورق الهدايا

فى اغلب الاحوال ورق الهدية مابيدلش على قيمة الهدية لكنه غلاف براق . اذا قابلت بنوتة شخص فى وسامة مهند الملزق ولياقة توم كروز و شاعر كفاروق جويدة يقود سيارته على المحور بسرعة 600 كيلو فى الساعة هذا الرجل الكوكتيل لا يقاوم و واو عليه و تطب الزبونة و تنهار كل متاريس المقاومة و تقع فى المصيدة و لا اتخن فار . ولكن هل هى احبت هذا الرجل ام احبت ورق الهدايا اللى بيغلفه ؟ هل ستتحمل هذه الوسامة الملزقة بدون خشونة الرجل هل ستتحمل شعره طول النهار قبل الاكل و بعده ؟ هل ستتحمل منظره و هو عاملى فيها توم كروز و هو بينط فن فوق سطوح العمارة اللى قصادهم و ينزل ميت حتة ؟ هذه الصفات لاتدوم و لا تعيش و قيمتها فى ورق الهدايا اللى مغلفها تعالوا نشيل ورق الهدايا المزركش و نشوف ! هنلاقى صباع كفتة بايت و معفن و مقدد

دور عالحب الالمانى

عزيزى الشاب عزيزتى الشابة اذا كنتم اكلتم زمبة فى حبيب لديكم و لم تنجح استمرارية الخطوبة فثقوا ان هذا الحب كان تايوانى او كورى فالحب الاصلى سوف يأتى فى موعده دون سابق اعداد و لا تنخدعوا بحب السيما و الروايات وحب الكبارى و محطات مترو الانفاق و الاتوبيسات و الكافيهات وحب العزيز فكلها تصنف تحت بند الحب المضروب و لا تنخدع بما تراه من شباب يتسكع مع صدور مخلية و استدارات خلفية فكلها بضاعة صينى مضروبة اما الارتباط و الزواج فيلزمه بضاعة المانى نادرآ ماتتطلب صيانة و قطع غياره اصلية اما ما تراه حولك فمصيره محكمة الاسرة او محكمة زنانيرى

رسالة من الحكومة

انا عملت اصلاحات و تعديلات و مفيش حاجة محوءة فيكم عندكم خاصية الشكوى و الكلام اللى مالوش معنى و عيشتكم بقت كلها انتقادات . عايزين تتجوزوا ؟ ماهو ده اللى مودينا ورا . عايزين سكن و فرص عمل و مصاريف و خلفة عيال و بقكم دايمآ مفتوح عايزين تآكلوا مع ان الاكل عادة بدائية و بيجيب امراض تحبوا نلوث لكم الاكل بالزرنيخ ؟ و نخلص منكم ؟ و المصيبة عايزين تشموا هوا نظيف طب ليه ؟ هى دى الرجولة؟ ما تشموا هوا ملوث و شوية قش رز . و الكارثة عايزين سكن و بيوت هاهاها مالها الشوارع و الصحرا ماعندناش اكتر منها ليه عايزين تضيقوا الخناق على نفسكم ؟ ووظايف كمان؟ دانتوا صحيح طماعين طب عملوا ايه اللى اشتغلوا ؟ ماحنا بنرفدهم . احنا بقى بالعربى ناويين نبيعكم و لو بخسارة لأى دولة لسة بتستورد خردة . طب هاتسألنى هانعمل بالبلد ايه ؟ ليه انتم فاكرينها بلدكم يا غجر ؟ ها نأجرها يا ظريف مفروشة ايجار جديد و باليورو كمان . جتكوا القرف ؟ بابا نظيف

لأ بقه دى واسعة شوية

قرأت خبر خطير و مذهل على الحقيقة نت منذ ايام يقول ان سيدة حامل من امارة عجمان بالخليج ذهبت لطبيبتها التى تتابعها اثناء فترة حملها و هى فى الشهر السابع و اثناء الكشف تركت الطبيبة جهاز السونار و اخذت تصرخ الله اكبر الله اكبر و عندما سألتها السيدة عن سبب صراخها قالت لها ابشرى ابشرى ابشرى الجنين اللى فى بطنك بيصلى صلاة المغرب و هو دلوقت فى الركعة الاخيرة . فعلا ما يحدث لنا جعلنا فى مؤخرة الامم .