انا مهاجر لبنان

على موقع العربية نت فتوى منسوبة الى استاذ دكتور جليل بالازهر سبق ان شبعت كلام و تعليقات عنها و هى فتوى تبيح للمرأة العاملة ان تقوم بأرضاع زميلها فى العمل منعآ للخلوة المحرمة اذا كان وجودهما فى غرفة مغلقة و اكد على ان يتم ارضاع الكبير 5 رضعات مشبعات كل هذا سبق ان تناوله الجميع لكن الجديد الذى اضافه فضيلته ان على الرجل بعد الرضع ان يتجشأ يعنى يتكرع دليل الشبع و هذا هو الجديد . يا نهار اسود و مهبب يعنى اروح الشغل الصبح اقول لزميلتى صباح الخير تقوللى يللا عشان ارضعك او انا استعبط و اقولها انا عايز ارضع تخيل 5 رضعات فى وقت العمل بعنى الواحد يقضى اليوم كله رضاعة و تكريع على اى حال انا احتمال اسافر لبنان اشتغل سكرتير لهيفا وهبى

مصر هى امى

مصر هى امى و قال ايه نيلها هو دمى

مصر هى امى دى عرفناها و شبعنا فيها كلام لكن " نيلها هو دمى " دى اللى فيها كلام لاننا عشنا عمرنا عارفين ان بيجرى فى الشرايين دم احمر لكن النيل بيجرى فى الشرايين دى المصيبة فعلا لأن النيل ملوث اتارى الامراض منتشرة و الشعب حالته منيلة بستين نيلة يعنى لو اتعورت انزل نيل؟ ولو عايز اشرب اعور نفسى و اديها شرب من الجرح؟و يعنى لو عايز احلل اقول للدكتور حللى نيلى ؟ و بنوك الدم نسميها بنوك النيل ؟ فى الحالة دى لازم الشعب يتبع وزارة الموارد المائية .

ابو رأس قلقاسة و ابو رأس برتقالة

من واقع مشاهداتى سألت نفسى ليه الاجيال القديمة كانت راسهم قد البطيخة او القلقاسة الكبيرة بعكس اجيال اليومين دول اللى راسهم فى حجم البرتقانة ام صرة او الكانتالوبة. اتفرج على افلام زمان الابيض و اسود وشوف حجم راس سراج منير او فريد شوقى او يحيى شاهين و من الممثلات هند رستم او نادية لطفى او سهير رمزى حاجه ماشاء الله رغم انهم فى الافلام دى كانوا شباب صغننين و بعدين قارن رؤوسهم بهنيدى و احمد حلمى حنان ترك و منى ذكى وحاول تتخيل يحيى شاهين ماشى مع هنيدى فى الشارع مش ممكن واحد يقوله امسك فى ايد ابوك ياله لأتوبيس يهفك ؟ او سهير رمزى ماشية مع حنان ترك ممكن شحاتة تقول لسهير حسنة لله ربنا يخليلك البت المفعوصة اللى معاكى . احمد ربك بقى على الكنتالوبة اللى فوق جسمك

زوروا هذا المعرض

تستضيف العاصمة الهندية نيودلهى اول متحف لدورات المياه و المراحيض و مستلزماتها منذ حضارة وادى السند التى ترجع الى 5000 سنة الى الآن تحت اشراف الدكتور بندشاور باثاك مؤسس منظمة سولانا و من المنتظر ان تشارك مصر فى هذا المتحف و سيتم فقط عرض نماذج لاعمدة كوبرى اكتوبر و اسوار المدارس التى تستخدم للصرف الخفيف وعليها ابداعات الفنون المائية بأشكال سيريالية و صور للخرابات و الترع و المصارف التى تستخدم للصرف الثقيل بالاشكال المخروطية والحلزونية و المسطحة معبرة عن قدرة الفنان فى التشكيل الحر بالشكل و اللون و الرائحة

تحيا اللهجة المصرية

منذ سنوات كنت اقف فى طابور امام احدى السينمات فى دولة عربية للحصول على تذكرة وكان الطابور لا يتحرك فسألت الاخ الذى يقف امامى عن السبب و اتضح فيما بعد انه لبنانى فقال " غليظة و الله المرة ام علكة فى تمها اللى لابسة التنورة وسط النسوان هونيك لو فشخت فشخة صغيرة هانصير قدام و يصير الطابور احسن كتير " هذه العبارة لو كان تلفظ بها هذا الشاب فى طابور فى القاهرة كانت طارت فيها رقاب و اخد علقة ماكلهاش حمار فى مطلع و بوليس الآداب جرجره عالقسم لكن بحكم متابعتى للقنوات اللبنانية الشاب كان فى منتهى الادب و لم يتلفظ بأى لفظ خارج فقد قال لى " والله دمها تقيل الست اللى بتمضغ لبانة اللى لابسه جيب وسط الستات اللى هناك لو خدت خطوة صغيرة هانبقى قدام و ينصلح الطابور " اشكر ربك بقى انه خلقك بتتكلم لهجة مصرى و الا كانت طارت رقبتك .