تحرشات

التحرش اصبح ظاهرة مؤسفة علنآ فى شوارع القاهرة سواء كان تحرش لفظى او يدوى و خاصة الضرب على المؤخرة و يرجع ذلك الى التركيز الحكومى على اهمية البنية التحتية

انت سيد العارفين

مطربة البسكلتة ظهرت مؤخرآ على كثير من الموبايلات و تداولها الشباب و هى تستحم عارية
و هنا هب مخرج كليباتها الشهير ليقسم انها ليست هى
و عندما سئل عن سبب دفاعه عنها و انفعاله رد قائلآ
انا عارفها كويس دى عمرها ما استحمت

تقسيم اراضى قطع مميزة

قالت هيفا لاحدى المجلات اللبنانية
انا ارض خصبة للشائعات و القيل و القال
طب ما دام هى ارض خصبة محدش فيكم نفسه فى فدان ؟
قطع مميزة
و التسليم بأولوية الحجز ؟

ماذا لو ؟

وحدة لقياس الرأى العام اجرت استطلاعآ كشف ان 65 بالمائة من المشاركين يؤيدون تولى المرأة منصب رئيس الجمهورية
لكن فى هذه الحالة ماذا سيكون دور زوجها
اكيد سيتولى مكتبة الاسرة و مهرجان الفراءة للجميع
مش كده و لا ايه ؟

و الله ما هو عيب

فى كل دول العالم المتحضر تسمع عن الرئيس الحالى و الرئيس السابق و كلمة الرئيس السابق مش عيب و لا عورة لكنها تدل على عمق الديموقراطية فى هذه البلاد
لذلك ارسلت حكومتنا الرشيدة تستفسر من مجمع اللغة العربية
يعنى ايه رئيس سابق ؟

علينا العوض

سألت مسئول حكومى
امتى الحكومة هاتبطل آذية فى الخلق ؟
رد ببرود
لما صباح تبطل تغنى

صباح الخير يا دكتور

فى سابقة الاولى من نوعها قررت الحكومة نقل المواطن نقلة نوعية غير مسبوقة فقد قررت تحويل كل من يملك سيارة الى استشارى جراحة عامة ابتدأ من 1 اغسطس فمن شروط قانون المرور الجديد تحويل سيارتك الى وحدة جراحة اليوم الواحد و ان يتواجد فى سيارتك شنطة بها 3 باكو شاش معقم 3 باكو رباط ضاغط 3 لفة شاش عادى باكو قطن كبير علبة شريط بلاستر زجاجة مطهر مركز و اخرى مخفف مقص و جفت جراحة علبة مرطب حروق قفاز طبى معقم ضمادات مرطبة للعين ميركيركروم الشنطة من البلاستيك المقوى الابيض وعليها علامة الهلال و الصليب الاحمر
و الف مبروك يا دكتور الف مبروك يا دكتورة و عقبال البكارى

كلثوميات

فى اوائل الخمسينات غنت ام كلثوم رائعتها مصر تتحدث عن نفسها
و بعد اكثر من نصف قرن اصبحت مصر تتحدث مع نفسها
و دى اشد درجات المناخوليا

احجز نسختك من الآن

ظهر فى الاسواق احدث كتاب لهذا العام لا فيه كدب و لا نفاق و لا موالسة للحكومة و لا للحاكم و عنوانه
دليل تليفونات القاهرة الكبرى
افتنى نسختك من الأن

مناظر مؤذية و مزرية

عندما تجد رجلا شكله محترم و لازق وشه بأمير على فاترينة محل يبيع اللانجيرى الملابس الداخلية الحريمى و مصيبته السوده ان الفاترينة مقززة كل المعروض فيها احمر
وواحد طويل عريض واقف تحت كوبرى وشه للحيط و ظهره للشارع بيساهم فى مشروع جمل بلدك بنافورة
و الاتنين ينطبق عليهم هذا المثل
اتلم تنتون على تنتن
واحد نتن و التانى انتن

يورو 2008
رياضة جديدة اسمها كرة القدم

ذهلت و انا اشاهد نهائيات كأس الامم الاوروبية يورو 2008 للعبة جديدة علينا اسمها كرة القدم يتناقل فيها اللاعبون الكرة بأقدامهم و يحاولون التسديد على مرمى الخصم
نظام اخلاق اثارة لعب فن رجولة ابهار اداء قوة
تشجيع على ارقى مستوى تحكيم عادل جماهير زى الفل تنظيم مثالى هذه اللعبة الجديدة مشوقة للغاية
و السؤال الآن لماذا لا تفكر الحكومة جديا فى ادخال هذه اللعبة الى مصر لادخال البهجة لقلوب المصريين بدلا من الحكشة التى نمارسها على انها كرة قدم ؟
قبل ما انسى سلمولى على ابو تريكة

موروستان اشارات المرور
هايبر ماركت ميدان روكسى

اشارة ميدان روكسى تحولت الى هايبر ماركت يباع فيه كل شىء مشط فلاية هو لسه فى حد فى راسه قمل و استك بيجاما و برضه هو فى حد لسه بيدكك نفتالين بلى اقلام جاف طارة دركسيون دواسة عربية ده من ناحية كرسى القيادة من ناحية المدام بياع فل من غير ريحة و ياسمين يطفش الناموس و دعوات ان ربنا يخلينى للمدام من ناحية الولاد دعوات بالنجاح و الزواج و الذرية الصالحة ثم دفعة من بائعى الجرايد و المجلات البايتة و المناديل المعطرة بمسك الحسين و اجارك الله عالريحة ثم مجموعة هربانة من القصر العينى يحملون شهادات طبية لأجراء جراحات مخ قلب صدر و كبد ثم بائعى الاعشاب الطبية اللى تجيب اجلك بمجرد تناولها و اخيرا شو الكسيح و الضرير و مجموعة عاهات لكن المضحك ان بمجرد فتح الاشارة يتحول الكسيح الى مايكل جوردون و يجرى زى الصاروخ و الكفيف فتح بمشيئة الرحمن و ابو رجل مسلوخة بقى و لا ابو تريكة
و اهو موروستان و رزق الهبل عالمجانين

ممدوح و اثاره السلبية

مين فيكم يا شاطرين فاكر اغلس و ارخم و اثقل دم ظهر على مر العصور و التاريخ ؟ بدون ذكر اسماء طبعآ هو ممدوح موسى و عشان ماحبش اجيب سيرة حد ممدوح موسى يفكر فى تقديم برنامج فى شهر رمضان الكريم و لقدرته الفائقة فى سحب الاوكسوجين من اى محيط يظهر فيه تهيب منظمات حقوق الانسان المواطنين الذين يرغبون فى مشاهدة برنامجه بالتقدم للحصول على انبوبة اوكسوجين نقى لاستخدامها عند ظهوره
و اللهم انى لا اسألك رد القضاء بل اسألك اللطف فيه

مستر دراكولا و مسيو فرانكشتين

هناك شائعة او دراسة مجهولة تقول ان الطفل المصرى اذكى طفل فى العالم حتى يبلغ سن دخول المجازر اى المدارس فيتلقفه مستر دراكولا و مسيو فرانكشتين و المربى الفاضل ابو رجل مسلوخة و كل زبانية و جلادين و مصاصى دماء وزارة التلقين فيتحول بقدرة قادر الى اغبى طفل فى العالم و يستمر الحال حتى يصل للثانوية العامة فيكون فى ضيافة الاستاذ تفاضل و شقيقه السيد تكامل و تكون نهايته اما بالانتحار او بحجز جناح له بموروستان العباسية

لا يحدث الا فى مصر
مباراة مصر و جزر القمر مباشر

قبل المباراة مندوب الداخلية يشرح فى التلفزيون كيفية الوصول الى الاستاد عشان ماتتوهوش الطرق البديلة و الطرق المتاحة لان فى طرق غير متاحة و ان كنت جاى من اليونان تسلك صلاح سالم ثم تنحرف يمين ثم يسار و القادم من ام درمان ميدان العباسية ثم طوالى
يبدأ الماتش بعد تسخين على بوتاجاز اطلس نار هادئة و المعلم حسن شحاتة ضارب بوز و تكشيرة اجارك الله هتافات و اعلام و المصريين اهمه و يفوز المنتخب 18 صفر على جزر القمر و قبل نهاية المباراة بدقيقة ما تفهمش ازاى تقرأ المذيعة الرسالة التى بعث بها السيد رئيس الجمهورية لتهنئة المنتخب و طول الليل عطلة مرور و طبل و زمر و يا دنيا لفى و طوفى تعالى و شوفى الكنز اللى اسمه المصريين
و شكرآ يا كنز

صبيان و بنات
عشان تحلف انك اتربيت قى بيت مصرى
توجيهات الاب الواعى لابنه رفاعى

ما تكلش و انت واقف للاكل ينزل فى ركبك
ميلودى مش هاتنفعك يا خايب قوم ذاكر
مالكش دعوة بالسياسة و ما تتلمش عالعيال المندسين
مال البنطلون مهرهر من ورا كده
ماتكلش من ماكدونالدز ليجيلك سرطان
ايه حكاية القميص اللى عاللحم ده يا صايع
انت فاكرنا لاقيين الفلوس دى فى الشارع
طلع ايدك من جيبك و قوم اقف وانت بتكلمنى
انت بتكح ليه ياله اوعى تكون بتشرب سجاير و لا بتضرب بانجو
انت فاكرنى مش فاهم ياله انا كنت شيطان و انا صغير
جل ده اللى انت حاطه فى شعرك و لا دى سمنة بلدى
جتك نيلة عالنادى الاهلى اللى هايرجعك ورا

صبيان و بنات
انا و هو و الموبايل
عارفة ليه كنت قافل الموبايل يا حياتى كنت فى عزا فى عمر مكرم ام واحد صاحبى اتوفت
الكداب كان فى سيلانترو
معلش يا روحى الشحن فصل
كان حاطه عالشاحن
انا كنت سايق فى التحرير و الدنيا زحمة موت عشان كده مارديتش
المزة كانت جنبه
والله ماكنت قافله الشبكات بقت منيلة بستين نيلة
كان قافله
معلش واقفين عنى الخدمة انت عارفة اخنا اخر الشهر و الفاتورة بقى
موبايله كارت مش خط
قافل الموبايل عشان انت عارفة بنقفل الميزانية
مفيش ميزانية الشهر ده
انت موبايلك كان مقفول ليه امبارح
اصلا ما اتصلش
ماسج ايه ما هو مفيش كريدت معايا
كان شاحن ب 100 جنيه
النوكيا اعطاله بقت كتيرة
موبايله سامسونج
انا هاقفل دلوقت المدير دخل مكتبى

ملحوظة انا كمان هاقفل دلوقت مراتى طلبانى و مش عارف اتحججلها بأيه

صبيان و بنات
عشان تحلف انك اتربيت فى بيت مصرى
نصايح الام الواعية لبنتها المايصة
يا بت ماتتأصوعيش كده و انت ماشية و شيلى اللبانة اللى فى بقك فاكرة يا بت نفسك ميمى شكيب
بلاش ياختى مذاكرة عالمزيكا
بلاش وقفة الشبابيك دى الست عدلات تقول عليكى ايه ؟ صايعة
ما تبطلى يا بت رغى فى الزفت الموبايل
و النبى عبد الحليم ما هاينفعك وطى المدعوق ده شوية
يا بت ما تتقلبيش كده فى السرير انت عندك مغص
غيرى القناة دى يا مقصوفة الرقبة بلاش مسخرة و قلة حيا
قومى يا مقصوفة اقلعى البنطلون المحزق على جتتك ده انت بقيتى و لا هيفا
اقفلى يا بت زراير البلوزة من فوق ها تعمليلى زى شادية فى شبابها
من هنا و رايح مش عايزاكى تمشى و لا تعرفى البت سوسو ولا فافى و لا نانى و لا توتى امشى بس مع البت فتكات الدكرورىصبيان و بنات
عشان تحلف انك اتربيت فى بيت مصرى
نصايح الام الواعية لبنتها المايصة
يا بت ماتتأصوعيش كده و انت ماشية و شيلى اللبانة اللى فى بقك فاكرة يا بت نفسك ميمى شكيب
بلاش ياختى مذاكرة عالمزيكا
بلاش وقفة الشبابيك دى الست عدلات تقول عليكى ايه ؟ صايعة
ما تبطلى يا بت رغى فى الزفت الموبايل
و النبى عبد الحليم ما هاينفعك وطى المدعوق ده شوية
يا بت ما تتقلبيش كده فى السرير انت عندك مغص
غيرى القناة دى يا مقصوفة الرقبة بلاش مسخرة و قلة حيا
قومى يا مقصوفة اقلعى البنطلون المحزق على جتتك ده انت بقيتى و لا هيفا
اقفلى يا بت زراير البلوزة من فوق ها تعمليلى زى شادية فى شبابها
من هنا و رايح مش عايزاكى تمشى و لا تعرفى البت سوسو ولا فافى و لا نانى و لا توتى امشى بس مع البت فتكات الدكرورى

صبيان و بنات
1 اذا سمعتى الكلام اللى جاى من حبيبك او خطيبك اعرفى انه ناوى يفلسع و يديكى زمبة متينة
2 فكرة الجواز دى فكرة عقيمة و ان عن نفسى مش حاببها
ممكن يتجوز بكره
3 ايه رأيك نخلينا اصحاب احسن مفيش اقوى من الصداقة
بيحب واحدة تانية
4 و الله انت تستاهلى واحد احسن منى عمر الشريف مثلا
و انت كنت عبد الفتاح القصرى مثلا
5 حاولت احبك قد ما بتحبينى بس مش قادر
كداب ابن كداب
6 قدامى سنين اكون نفسى فيهم حلوة يعنى قعدتك جنبى
معاه فلوس بالهبل
7 التوافق الكيميائى بينا منعدم بس اتأكدى ان العيب فيه انا
لا فيه كيميا و لا فيزيا
8 انت بكره يجيلك سيد سيدى
بداية الفلسعة
9 لو انت اتجوزتى غيرى او انا اتجوزت غيرك حبنا هايفضل مالى الدنيا
شوية رومانسية خايبة بقرش
10 مش عارف ليه الموبايل بتاعى اليومين دول بيدى خارج نطاق الخدمة
عشان ما تتصليش

ملحوظة : اذا قدرتى تقابليه بعد كده ابقى قابلينى

سيما اونطة هاتوا فلوسنا
تخيلت نفسى كاتب سيناريو لاحد افلام الميلودراما المصرية
البطل للبطلة :اللى فى بطنك ده لازم ينزل فى الحال
الدكتور :اضطرينا نضحى بالجنين عشان سميحة هانم تعيش
ممكن نشوفها؟
مش هاتقدروا تشوفوها دلوقت هى فى الانعاش بتفيص احنا عملنا اللى علينا و الباقى على ربنا
طب و شوقى بك ؟
الحمد لله العملية نجحت بس الاقدار كانت اقوى مننا شدوا حيلكم شوقى بك مات
طب و نينة
عندها شوية شلل رعاش و شوية اورام فى المخ هاتفش مع العلاج
نسفرها امريكا ؟
ليه العلاج عندنا على اعلى مستوى و كمان المسافة من هنا لمقابر الغفير مش بعيدة

سؤال لطلبة اكاديمية الفنون

تقيم احدى الجمعيات حفلا خيريآ لصلح مرضى الصدر

من ترشح لاحياء هذا الحفل هيفاء ام نانسى ؟ و لماذا ؟ مع بيان السبب

زواجك تقليدى و لا عن حب

اذا وضعت فى صدر شقتك صورة جوازك ببرواز مدهب و انت فى حالة تشنج و تناحة ببدلتك و المدام مبرقة عينيها بفستان زفافها المصنع ب 2 كيلو ترتر و متصور فى استديو بلبل فى المطرية
فزواجك زواج صالونات
اذا كانت صوركم موزعة فى اركان المنزل و محفوظة فى البومات
فأنت متزوج عن حب
اذا كان اثاث منزلك دشم حروب حجرة الطعام موديل الفيل ابو زلومة و صالونك مدهب يشبه السد العالى و حجرة نومك طراز الملايكة و لونها بمبى و كله وارد دمياط
فزواجك زواج صالونات
اما اذا كان منزلك بسيط و تكثر المساحات الخالية و الواسعة
فأنت متزوج عن حب
اذا استقبلت ضيوفك ببيجامة كستور مقلم موديل حسين صدقى 1940 و روب دى شامبر كاروهات موديل عماد حمدى و زوجتك فستان بروش نايلون و روب كابيتونيه زى اللحاف
فزواجك زواج صالونات
اذا ارتديت شورت و تى شيرت و زوجتك بادى و برمودا
فأنت متزوج عن حب

و للتصنيف بقيه

حاسب على عضلاتك

بعد تزايد ظاهرة الشباب الذين يمارسون البودى بيلدنج و تحولوا الى لوادر و بلدوزارات تعوق حركة المرور خاصة عند الاندية الخاصة قرر المجلس الاعلى للشباب تحديد شاسيه الجسم لكل فئة عمرية و من يتجاوزه من الشباب ستقوم ادارة الحى الذى يتبعه الشاب بأستصدار امر ازالة فورآ للاجزاء المخالفة و البارزة بجسمه
انا حذرتك و انت حر

تعلن وزارة القوى العاطلة عن وظائف معينة لمناسبات معينة للمساهمة فى مزيد من البطالة
1 بلطجية انتخابات للادلاء بأصواتهم لصالح الحكومة
2 بلطجية لاطلاقهم فى المظاهرات على اعداء البلد
3 هتيفة درجة تالتة لماتشات المنتخب الوطنى و الله و عملوها الرجالة
4 آنسات للوقوف فى البلكونات و الزغردة للمسئولين فى زياراتهم للمدن الجديدة
5 شباب شكله محترم للجلوس فى مقاعد الاعضاء المتغيبين دائما عن جلسات المجلس الموقر
6 شباب بدقون للجلوس فى البرامج الدينية التليفزيونية
7 انسات ملعب و مايصة و مزز لبرامج هالة شو
8 شباب حشرى للمداخلات التليفونية
الاشتراطات شهادة تفيد انك عاطل منذ اكثر من 25 عاما

تصريحات صحفية لفنانات تجاوزن الصلاحية

فنانة تجاوزت التسعين
انا بابى هو اللى بيختارلى ادوارى
اقبل ادوار الاغراء اذا كان فى سياق الفيلم
و الله الفن سرق امومتى

فنانة كانت فى خلفية فيلم تشترى كيلو طماطم
مش مهم مساحة الدور المهم قيمة الدور

فنانة لم تظهر على الشاشة من اربعين سنة
الفنانة الحقيقية لا تطرق ابواب المنتجين

فنانة مثلت دور شغالة فى الخمسينات
افكر فى الاعتزال

فنانة صورها دائما شبه عارية
ارفض القبلات و المايوه فى افلامى

ثقافتى فرنسية لانى خريجة كوليج دو لاسال
المدرسة دى عمر ما دخلتها بنت بنين فقط

انت تقليدى ام متطور

اذا كان عندك عربية لادا لونها بنى او بيج و حاضن الدركسيون و المدام لازقة وشها فى الزجاج الامامى
فأنت انسان تقليدى و غلس
اما اذا كانت سيارتك بسيطة و لونها مبهج و مرجع كراسيها و مراتك مسترخية
فأنت غير تقليدى و روش
اذا تكلمت عن زوجتك و قلت الست بتاعتى او الجماعة او انا عندى فى البيت
فأنت تقليدى و جلنف
اما اذا قلت انا و رانيا رايحين شارم
فأنت غير تقليدى و تجنن
اذا عزمت مراتك فى المناسبات القومية عند ابو شقرا الكبابجى و طلبت كفتة و نيفا و ربط الفوطة حوالين رقبتك انت و هى
قأنت انسان متعب و مقرف
اما اذا عزمت مراتك فى اى وقت و فى اى يوم بدون مناسبة عند كورتيجيانو او لاكازيتا
فأنت انسان مبهج و فرفوش
اذا دخلت السينما انت و الجماعة و فرقعت كيلو لب اسمر و طفشت رواد السينما
فأنت نسناس
اما اذا كان معاكم علبة بوب كورن
فأنت انسان راقى و حساس

الميت ابقى من الحى

هل يتصور احد ان اموات يصرفوا على احياء
اغلب دول العالم تأتى مواردها من الصناعة و التجارة و التقدم التكنولوجى من ابتكارات و اختراعات الا فى مصر فتأتى مواردها من تدفق السياح لزيارة مقابر موتانا الاهرامات مقابر الموميات فى المتحف الاقصر اكبر جبانة فى العالم
و من هنا نلاحظ اننا البلد الوحيد فى العالم اللى فيه الاموات و هم الفراعنة ينفقون على الاحياء اللى هما احنا

البلد بتتحرك

لما قلت لكم البلد بتتحرك افتكرتونى كحكومة باهزر لأ يا خفيف انت و هو احنا حنتحرك بك او من غيرك و ده طبعآ احسن
و لو عايز تعيش يا مواطن قلب رزقك بمعرفتك انا كحكومة مش هاشغل مخى بيكم يا كحيانين انا مش عم عثمان الشغال اللى اهلك جايبنهولك انتم يا حبيبى مش على خريطة الحكومة ولا على هواها و مش هانسمعكم و لا هنسأل فيكم فكركم الحكومة ما تقدرش توفر لكم حياة كريمة؟ لأ تقدر بس عايزاكم تكفروا و لا الحكومة مش قادرة تلاحق عالاسعار ؟ تقدر بس مش حتلاحق
انت مش على بال الجكومة و لا على جدول اعمالها لان جدول اعمالها فيه بند واحد انت معاك كام ؟
مين بيطلع القرارات فى البرلمان هاتقوللى الشعب تبقى اهبل و مش فاهم حاجة
اضرب رأسك فى الحيط انا القطر انا الحكومة البلد بتتحرك عايزين تركبوا بنظامنا اهلا مش عاجبكم اقرأ الجملة دى من تانى

افرح يا قلبى

من حقنا ان نفرح و نفخر اننا من الدول التى تهتم بذوى الاحتياجات الخاصة و المعاقين ذهنيآ الا ان الدائرة اتسعت و شملت كل سكان مصر و اصبحنا جميعا من ذوى الاحتياجات الخاصة اما المعاقين ذهنيآ فهم اهل الحظوة فمستقبلهم مضمون بالوصول الى مراكز اتخاذ القرار بالحكومة
وافرح يا قلبى